Миясидан ўқ еб комага тушган Обид қори қаддини тиклади

Беш йил бурун Швециянинг Стромсунд шаҳарчасида ёлланма қотил томонидан отиб кетилган таниқли имом Обидхон Назаровнинг яқинлари унинг анча тузалиб қолганини билдиришмоқда.

Имом узоқ йиллар давом этган комадан сўнг, эндиликда атрофни мустақил кузатиб, фикрлайдиган, ўрнидан туриб қаддини ростлайдиган даражага келган.

Элтуз мухбири билан гаплашган имомнинг ўғли Довудхон кейинги кунларда дадасининг соғлиғи билан боғлиқ анча ижобий ўзгаришлар бўлганини айтди.

«Дадамнинг аҳволи анча оғир эди. Унинг аста секинлик билан оёққа туришлари деярли ҳеч кимнинг ҳаёлига келмаганди» деди Обидхон Назаровнинг ўғли жумладан Элтуз мухбири билан сухбатида.

Бироқ, айни пайтда имомнинг тўлиқ соғайиб, ўз фаолиятини давом эттиришига анча борлигини, ўқ асоратлари хануз сақланаётганини билдиради у.

Имом Обид Назаров Ўзбекистон ватандоши бўлган ёлланма қотил Юрий Юуковский томонидан 2012 йилнинг 22 февралида Стромсундда отиб кетилганди.

Даставвал, 2015 йилнинг декабрида эса Остерсунд туман суди Юрий Жуковскийни 18 йилга озодликдан маҳрум қилиш ҳақида ҳукм чиқарган.

Кейинчалик, иккала томон шикоятидан сўнг Сундсваллда ўтган аппеляция суди 37 ёшли Жуковскийни умрбод қамоқ жазосига ҳукм этди.

Довудхон Назаровнинг Элтузга билдиришича, Швеция терговчилари Ўзбекистон доҳил суиқасдга алоқадор яна бошқа шахсларни ҳам аниқлаган ва суиқасд суриштирувини ҳали ҳам давом этмоқда.

Eltuz.com