Нурилла Отахонов Тошкент аэропортида ҳибсга олинди

27 сентябр куни Туркиядан Ўзбекистонга қайтиб келган ўзбек ёзувчиси Нуруллоҳ Муҳаммад Рауфхон (Нурилла Отахонов) ҳибсга олинди.

Ёзувчининг рафиқаси Гулнора Отахонованинг Рейтерга хабар беришича, Чоршанба куни эрталаби, милиция аэропортда эрининг қўлига кишан солган ва милиция бўлимига олиб кетган.

26 сентябр куни Тошкентга учиш олдидан ёзувчи «Элтуз»га интервью берган, уни қора рўйхатлан ўчиришгани, ҳукуматнинг ўзи уни қайтишга таклиф қилганини билдирган.

Нью Йорк сафарида Мирзиёевнинг мухожирларни ватанга чорловидан руҳланиб у Ўзбекистонга қайтишга аҳд қилган эди.

«Ватанга қайтишни кимдир бошлаб бериши керак бўлса мана мен бошлаб бераман биринчи бўлиб» деган эди у «Элтуз» мухбирига Тошкентга учиш олдидан.

Сўнгги олинган маълумотларга кўра, Нурилла Отахонов Тошкент транспорт прокуратураси томонидан сўроқ қилинмоқда.

Eltuz.com