Тошкентда суд тиббий эксперти 100$ пора олаётганида қўлга тушди

Ўтган шанба, 12 август куни Тошкент шаҳар суд тиббий эксперти Акром Сулейманов ҳибсга олинди.
Акром Сулейманов бир шахснинг ишини битириб бериш ваъдаси билан аванс сифатида 100 АҚШ доллари пора олаётган пайтда Тошкент Прокуратураси шаҳар департаменти томонидан қўлга олинган.
Икки ойча муқаддам СамПИдаги Тошкент шаҳар Суд тиббиёт экспертизасига қарашли моргда бир лаборантка Наргиз Жалолова ва Алишер исмли эксперт ўлим ҳақидаги маълумотнома учун 150 минг сўм пора талаб қилгани ортидан жабрланувчи порталга мурожаат қилган эди.
Тошкент шаҳар Суд тиббиёт экспертизаси раҳбари ўз ходимлари кирдикорини яшириш учун мазкур ходимларни бошқа шўъбага ротация қилиб юборган.
Ўтган йил октябрда ДХХ ва Прокуратура департаменти ходимлари Тошкент шаҳар Суд тиббиёт экспертизаси раҳбари Норжон Султонованинг ўзини 2.500$ пора олаётган пайтда қўлга олишганди.
Элтуз мобил мухбирига кўра, Норжон Султонова билан бирга яна олти нафар тиббиёт ходими, жумладан айни муассаса ҳисобчиси, тиббиёт комиссияси бошлиғи ва Тошкент шаҳри Юнусобод тумани бош врачи олиб кетилганди.
Нусхаси Элтузда бўлган Тошкент шаҳар прокуратураси томонидан Ўзбекистон Соғлиқни Сақлаш Вазирлигига йўлланган Тақдимномага кўра, прокуратура Норжон Султонова устидан Жиноят Кодексининг 210 моддаси 2-қисми “в” банди билан дастлабки тергов ҳаракатларини олиб борган.
Ушбу Тақдимномага яқин кунлар ичида Элтуз алоҳида тўхталади.
Тергов хулосасига кўра, Норжон Султонова 14 октябр куни В. Т. Асановага сохта тиббий экспертиза хулосаси бериш учун ундан 2,500 АҚШ доллари олаётган пайтда ҳибсга олинган.
ДХХга яқин ҳамкорлик қилиши билан танилган ва Элёр Ғаниев одами эканини айтиб мақтаниб юрувчи Норжон Султонова бир кун ўтар ўтмас озод этилди.
Норжон Султонова ҳозир ҳам Тошкент шаҳар Суд тиббиёт экспертизаси раҳбари сифатида иш олиб бормоқда.
Айни муассасада ишловчи Элтуз манбасининг айтишича, Норжон Султонова “қилган харажатларимни чиқариб олишим керак, шунга газни босинглар” дея ўзининг хос ходимларига қўрқмай пора олишга топшириқ берган.