Германия канцлери: «Сурияда уруш тугади. Қочқинлар ватанига қайтарилиши керак!»

Deutsche Welle нашрининг ёзишича, ФРГ канцлери Фридрих Мерц «суриялик қочқинлар энди ватанларига қайтарилиши керак, чунки уруш тугади» дея баёнот берган.

«Энди сурияликларга Германияда бошпана бериш учун асос йўқ, шунинг учун биз депортацияни бошлашимиз мумкин», — деди Мерц Шлезвиг-Гольштейн Бош вазир Даниэль Гюнтер билан бўлиб ўтган қўшма матбуот анжуманида.

ФРГ Канцлери сурияликларнинг аксарияти ўз мамлакатларига ихтиёрий равишда қайтиб, унинг тикланишига ёрдам беришига умид қилмоқда. Бироқ суриялик қочқинлар ўзларининг вайрон бўлган юртларига қайтишни астойдил исташаётганлари ҳам йўқ.

Айни фикрни яқинда Дамашққа ташрифи чоғида Германия Ташқи ишлар вазири ҳам билдирган: «Германияда яшовчи суриялик қочқинлар яқин келажакда ватанига қайтишлари даргумон».