Ko‘zbo‘yamachilikka mustahkam poydevor qo‘yilmoqda

O‘zbekistondagi ayrim mahalliy internet nashrlari, jumladan, «Kun.o‘z» sayti mamlakat Kasaba uyushmalari federatsiyasi matbuot xizmatining xabarini chop etdi.

Bu xabarda aytilishicha, O‘zbekiston Respublikasining milliy qonunchiligida majburiy va bolalar mehnatidan foydalanish taqiqlanadi.

Biz bu xabarning e'tibor qaratish lozim bo‘lgan ayrim jihatlariga to‘xtalib o‘tamiz.

Avvalo, u aholi e'tiborini majburiy va bolalar mehnati taqiqlangani masalasiga qaratishni emas, balki «har bir fuqaro paxta yig‘im-terimida ixtiyoriy tarzda qatnashish huquqiga ega»ligini ta'kidlash maqsadini ko‘zlagani shunday bilinib turibdi.

Mana, o‘zingiz o‘qing: «O‘zbekistonning har bir fuqarosi paxta yig‘im-terimida ixtiyoriy tarzda qatnashish huquqiga ega. Agarda sizning huquqlaringiz buzilsa, 1092 ishonch telefoni bo‘yicha qo‘ng‘iroq qiling”.

Bundan «terimda qatnashish huquqingiz buzilsa, ishonch telefoniga qo‘ng‘iroq qiling», degan ma'no kelib chiqyapti-ku, shunday emasmi!?

Qolaversa, xabar paxta terimiga majburlab jo‘natilayotgan aholi vakillari uchun emasligi, balki bu jarayonni kuzatib kelayotgan xalqaro tashkilotlar bilan muzokaralarda o‘ziga yarasha «ko‘zir qarta»ga ega bo‘lishni ko‘zlashi yaqqol ko‘rinib turibdi.

Ya'ni «biz hatto aholi o‘rtasida majburiy mehnat qonunga zid ekani to‘g‘risida tushuntirishlar o‘tkazdik», degan iddao qilinishi uchun poydevor qo‘yilyapti.

Bundan tashqari, bu xabar ishonch telefonlariga qo‘ng‘iroqlar deyarli bo‘lmaganini (chunki bu qo‘ng‘iroq hech narsa bermasligini, aksincha, qo‘ng‘iroq qilinuvchining o‘ziga qarshi qo‘llanilishini ko‘pchilik biladi) paxta terimiga jalb etilganlar bu jarayonda «ixtiyoriy» ravishda ishtirok etmoqda, deb ko‘rsatish uchun ham zarur.

Aslida majburiy mehnat mexanizmining bir murvati hisoblanmish Kasaba uyushmalari federatsiyasining asl maqsadi bu jarayoni ko‘zdan yashirishga urinish bo‘lganidan keyin yana undan nimani kutish mumkin?!

Odamlarning shikoyat qilmasligiga bir sabab, ular bilan birga paxtada bo‘ladigan boshliqlari, direktorlari shikoyati uchun ularni shu zahoti yoki kelgusida ta'zirini berishi mumkin.

Kasaba uyushmalari federatsiyasi esa hech qachon, odamlar huquqini himoya qila oladigan real institut bo‘lmagan.

U odamlar ishonchiga sazovor bo‘la olmaydi ham, chunki ko‘p yillar davomida odamlar ongida, O‘zbekiston Kasaba uyushmalari federatsiyasi (O‘KU) vazifasi hukumat siyosatini himoya qilishga qaratilgan yana bir davlat organidir, degan fikr shakllangan.

Eltuz.com