Sariq kasal bo‘lgan migrant Rossiyada ishlolmaydimi? 

Rossiyada migrantlarga bosim kuchaymoqda. Endi migrantlarning tibbiy tekshiruv kasalliklari ro‘yxati kengaytiriladi. 

Putin ostidagi hukumat migrantlarni tibbiy ko‘rikdan o‘tkazish tartibini kuchaytirishni rejalashtirmoqda. Bu haqda Qabmin a'zolari qo‘llab-quvvatlagan yangi taklif e'lon qilindi. 

Amaldagi qoidalarga ko‘ra, Rossiyaga kelayotgan mehnat migrantlari qator yuqumli kasalliklar, VICh infektsiyasi, narkotik moddalarga bog‘liqlik va boshqa fiziologik holatlar yuzasidan majburiy tibbiy tekshiruvdan o‘tadi. Endi esa ushbu ro‘yxatni kengaytirish taklif qilindi. 

Yangi tashabbus doirasida virusli gepatit, jumladan B va C turlari kabi kasalliklarni ham majburiy tekshiruv ro‘yxatiga kiritish masalasi ko‘rib chiqilmoqda. Shuningdek, migrantlar mamlakat hududiga kirganidan keyin belgilangan muddat ichida tibbiy ko‘rikdan o‘tishi shart bo‘lishi mumkin. Tekshiruv uchun vaqt chegarasi ham qat'iylashadi demak. 

Bu chora-tadbirlar aholi salomatligini himoya qilish, yuqumli kasalliklar tarqalishining oldini olish hamda migratsiya sohasidagi nazoratni kuchaytirishga qaratilgani bahona qilinayotir. 

Mutaxassislar fikriga ko‘ra, yangi talablar migrantlar uchun hujjatlashtirish jarayonini biroz murakkablashtirsa eam sog‘liqni saqlash tizimi uchun muhim ahamiyatga ega hisoblanadi. Sog‘ligida muammo bo‘lgan fuqarolar uchun esa ishlash imkoni yo‘qoladi. Bu esa Markaziy Osiyolik migrantlarning ahvolini tang qiladi.