Shoir Mahmud Rajab qamoqdan chiqdi

«Toshkentga yurish» qilgani uchun qamalgan 56 yashar shoir Mahmud Rajab o‘n kunlik hibsdan so‘ng 3 oktyabr kuni mahalliy vaqt bilan soat 15.30 da ozod etildi.

IIB hibsxonasi oldidan «Eltuz»ga xabar yetkazgan xorazmlik jurnalistning aytishicha, Mahmud Rajab ozod etilgan va uyiga jo‘natilganini bildirishgan.

Bloger Nafosat Olloshukurovaning taqdiri esa noma'lumligicha qolmoqda. Garchi 3 oktyabr kuni soat 15.30 lar atrofida Ollashukurovaning messenjer tarmog‘idagi akkaunti 10 daqiqaga qo‘shilgani kuzatildi. «Eltuz» uning yaqinlari bilan bog‘lanishga harakat qilmoqda.

25 sentyabr kuni Urganch shahri ma'muriy sudi raisi Dilmurod Ochilov «Toshkentga yurish» tashkil qilgani uchun ayblangan Mahmud Rajab va harakatni yoritgan bloger Nafosat Olloshukurovaga o‘n sutka ma'muriy jazo qo‘llanilganini ochiqlagani, shoir Mahmud Rajabning advokatdan voz kechgani haqida xabarlar chiqqan edi.

Nafosat Olloshukurova 24 sentyabr kuni tunda uni urishgani, ahvoli og‘ir ekani to‘g‘risida qamoqdan SMS chiqarishga ham ulgurgan edi. «Eltuz» manbalariga ko‘ra, «Toshkentga yurish» ishtirokchilarini IIB xodimlari avtobusga tiqib olib ketishayotgan paytda Nafosat Ollashukurova va kamida yana bir ayol kaltaklangan.

Eslatib o‘tamiz, Mahmud Rajab shoir Muhammad Solih asarlarini O‘zbekistonga olib kirganlikda asossiz ayblanib tergovga tortilgan.

“Eltuz” nashri shoir Mahmud Rajab va voqealarni yoritgan bloger Nafosat Olloshukurova taqdiri bilan bog‘liq voqealarni kuzatishda davom etadi.

Eltuz.com