KAMBAG‘ALLIKNI QISQARTIRISh TIZIMIDA… KAMBAG‘ALLIKKA YuZ TUTAYoTGAN XODIMLAR!

Toshkent shahar Bandlik boshqarmasi va unga qarashli tuman bo‘limlarida ishlayotgan ba'zi rahbarlar o‘z ish joyida himoyasiz qolganini, poraxo‘rlik va adolatsizlik qurboniga aylanganini aytishmoqda. Ularning so‘zlariga qaraganda, ayni paytda ular «kambag‘allikni qisqartirish» tizimida ishlab, aksincha, o‘zlari kambag‘allikka yuz tutayotgan xodimlardandir.

Eltuz tahririyatiga yo‘llangan murojaatda aytilishicha, bu holat 2025 yilning fevral oyidan boshlab yanada og‘irlashgan. Ayni davrdan boshlab Toshkent shahar Bandlik boshqarmasiga o‘zini «Markaziy bank raisining o‘rinbosari» deb tanishtiradigan Yakub Shakirjanovich Babajanov kelgan va tuman bo‘limlari rahbarlarini turli bosimlarga duchor qilgan.

Ayni vaqtdagi Kambag‘allikni qisqartirish va bandlik vaziri Botir Zohidov bilan yaqinligi qayd etilgan Yakub Babajanov bu tizimga «bankirlik» faoliyatidan kelgan. Manbalarga ko‘ra, u bankda ishlagan paytda 1,5 milliard so‘mlik ipoteka krediti olgan va bandlik tizimiga o‘tgach, bu qarzini yopish uchun tuman rahbarlariga noqonuniy «gruz» qo‘yishni boshlagan.

Murojaatda ta'kidlanishicha, har oyda turli hisob-kitoblar orqali, ishsizlik nafaqasi va kasbga o‘qitish mablag‘lari hisobidan rahbarlarga 500 AQSh dollari miqdorida pora yig‘ish majburiyati yuklangan. Hattoki 2025 yil 28 aprel kuni Yakub Babajanovning tug‘ilgan kuniga tuman rahbarlaridan 100 AQSh dollaridan yig‘ib berishgan.

Agar imkoni bo‘lsa, Yakub aka ikki farzandingizni oddiy davlat maktabiga bering. Xususiy maktab uchun har oy 10 million so‘m to‘lash o‘rniga, bu xalqning og‘ir ahvolini o‘ylasangiz bo‘lardi,— deyiladi murojaatda.

Xodimlar aytishicha, bu kabi rahbarlar o‘z manfaatlarini xalq manfaatidan ustun qo‘yishmoqda. «Toshkent shahrida shu yil mobaynida kambag‘allikdan chiqarilgan biror oila bormi?» degan savol qo‘yilmoqda murojaatda.

Yakub aka va uning shogirdlari xalq dardini emas, faqat shaxsiy manfaatni o‘ylashmoqda. Ular telefon qilib tuman rahbarlaridan pul talab qilish o‘rniga, xalq va davlat xizmati haqida o‘ylashi kerak,— deyiladi maktubda.

Murojaat oxirida barcha tuman rahbarlari nomidan Eltuzdan yordam so‘ralgan: «Iltimos, ovozimiz bo‘ling. Bu adolatsizlikka nuqta qo‘yish vaqti keldi».