BOG‘OT TUMAN OBODONLAShTIRISh IDORASINI RAHBAR TALON-TOROJ QILMOQDAMI?

Eltuzga Xorazm viloyati Bog‘ot tumani obodonlashtirish idorasini rahbar talon-toroj qilayotgani haqida ishchi-xodimlar murojaat bilan chiqishdi.

Shikoyatga ko‘ra, idora rahbari bu lavozimga o‘tirgach qisqa vaqt ichida 20 gektar yer maydoniga ega baliq havzasi, issiqxonalar va fermer xo‘jaliklariga egalik qila boshlagan. 

Idora ixtiyoriga topshirilgan ikki katta samosvaldan biri ishda foydalanilmoqda, ammo ikkinchisi bir yildan buyon yo‘l yoqasida turibdi. Ma'lumotlarga qaraganda, bu texnikani balansdan tushirib, o‘zlashtirish ko‘zda tutilgan.

Iddaolarga ko‘ra, idora rahbari zahira xo‘jalik mudiri bilan til biriktirib kam ta'minlangan oilalar uy joyini ta'mirlash uchun ajratilgan qurilish mollarini o‘zlashtirishgan.

Ishchi-xodimlar obodonlashtirish idorasida haqqoniy audit tekshiruvi o‘tkazishni mas'ullardan talab qilishmoqda.