Paxta terimi tufayli yana SSSR davriga qaytayapmizmi?

Ma'lumki, hozirgi kunda paxta terimi avjida. Yaqinda Prezident paxtani tezroq terib olish bo‘yicha favqulodda yig‘ilish o‘tkazdi. Atrofidagi o‘risning nonini yegan amaldorlar har doimgidek Prezidentga yaxshi ko‘rinaman deb, “plan”ning orqasidan qattiq quvishni boshladi.

Sobiq SSSR dan qolgan bu “plan” balosi qarorda yo‘q qilingan bo‘lsa ham, amalda yildan–yilga kuchaymoqda.  Yil boshida xalqaro qishloq xo‘jaligi tashkiloti o‘z hisobotida O‘zbekistonni “paxta byurokratiyasi botqog‘iga botgan mamlakat”, deb bejiz aytmagan ekan.

Bu holat ayniqsa Andijon viloyatining tumanlarida kuchaymoqda. Shartnomani bajargan fermerlarni militsiya orqali hokimiyatga olib kelib, sal kam 50 tsentnerdan paxta topasan, yo‘q paxtani “perepiska” qilasan, deb bosim qilinmoqda. 

Buni yana bitta sababi davlat klasterlarga bergan minglab gektar yerlari paxta ekilmasdan qarovsiz qolib ketdi. Endi ularniyam yukini hokimiyat fermerlarga ag‘darmoqda.

Chunki klasterlarga hech kim tega olmaydi, ulardan hokimlar, prokurorlar, militsiya boshlig‘ining doimiy manfaatdorligi hech kimga sir emas.

Fermerni esa O‘zbekistonda xuddiki oilaning o‘gay o‘g‘liga bemalol o‘xshatsa bo‘ladi. Ularning tarafini olib gapirgan, rahmat aytgan birorta  amaldorni yangi O‘zbekiston davrida eshitmadik.

Hurmatli Prezident! Ijtimoiy tarmoqlarni o‘qib turishingizni aytgan edingiz. Ushbu holat Sizga yetib borsa, yordam bering. Bunaqa ahmoqgarchilikni kimga keragi bor?

Paxta “perepiska”si SSSR davrida millionlab o‘zbeklarni, ularning oilalarini juvonmarg qilgan-ku. Hozirgi kunda xam Sizga yaxshi ko‘rinish uchun hokimiyat militsiya bilan qo‘shilib har baloni qilishayotganini xalqimiz guvohi bo‘lib turibdi…