Uchko‘prikdagi maktablarga «qo‘shib yozish» topshirig‘i berildi

Farg‘ona viloyati Uchko‘prik tumani hokimining ma'naviy ishlar bo‘yicha o‘rinbosari Sh. Pozilov 10 dekabr kuni soat 15:00 da barcha maktab direktorlarini zum orqali yig‘ib, “tez bajarilishi shart” bo‘lgan navbatdagi topshiriqni bergan.

Talab bitta: 3-sinfdan 11-sinfgacha bo‘lgan bolalarga “sun'iy intellektdan foydalanish bo‘yicha individual mashg‘ulot o‘tildi” degan mazmunda 2800 dona sertifikat tayyorlanishi kerak. Hech qanday dars o‘tilgani yo‘q, lekin “berildi” deb hujjat to‘ldirish buyurilgan.

Topshiriqni bajarish muddati qisqa. Shuning uchun maktablarda kim kompyuterni bilsa “hashar”ga solingan. Sertfikatlar soni kam chiqsa, direktor so‘kish eshitadi.

Bu soxta qog‘ozlar kimning joniga oro kirmoqda?

Uchko‘prikda qo‘shib yozish oddiygina ishsizlik raqamlaridan ta'limga ham ko‘chgan. Berilmagan dars “berildi”, o‘tilmagan mashg‘ulot “o‘tildi” deb rasmiylashtirilyapti.

Uchko‘prikka xush kelibsiz – bu yerda statistika real hayotdan emas, hokimiyat topshiriqlaridan tug‘iladi.