Oltiariqdagi “namunali uzumzor” xarobazorga aylandi 

Farg‘ona viloyati Oltiariq tumani hududida joylashgan qirda ming gektar yerga uzumzor barpo etilgan. Loyiha ochilishiga Prezident kelishi rejalashtirilgani sabab hudud qisqa vaqt ichida juda obod qilingan, minglab odam jalb etilib, ishlar shoshilinch bajarilgan.

Mahalliy aholaning so‘zlariga ko‘ra, ochilish marosimigacha hudud namunali holatga keltirilgan. Bu jarayonda turli tashkilotlardan tashqari, ko‘chadagi mardikor ayollar ham ishga chiqarilgan. Ushbu ishlarga katta mablag‘ sarflangani aytiladi.

Biroq Prezident tashrifidan so‘ng hudud qarovsiz qolgan. MFY raislari va hokim yordamchilariga “erni aholiga o‘tkazish” bo‘yicha ko‘rsatma berilgani aytilmoqda. Shu targ‘ibotga ishonib, ayrim oilalar uzumzor yerlarini olgan.

Ammo amalda suv, infratuzilma va qishloq xo‘jaligi yordami bo‘lmagan. Uzumlar qurib bormoqda. Ayrim oilalar uyida ortiqcha ishchi kuchi borligi uchun baklashka va sisternalarda suv tashib, uzumni saqlab qolishga uringan. Shunga qaramay, taxminan 70 foiz yer maydoni qarovsiz holda qolgan.

Shu bilan birga, yer olgan aholi kredit to‘lashda davom etmoqda. Ilk uch yil oyiga 300–400 ming so‘mdan to‘langan. So‘nggi bir yilda esa oyiga 1 million so‘m to‘lashga to‘g‘ri kelyapti. Bir oy to‘lov kechiksa, keyingi oyga foizi qo‘shilib, qarz yana oshmoqda.

“U yer bizga kerak bo‘lmay qoldi, lekin quruq havo uchun har oy pul to‘layapmiz”, – deydi shikoyat qiluvchilardan biri. 

Uning aytishicha, uch nafar farzandi bor, turmush o‘rtog‘i ko‘chada mayda-cho‘yda sotib kun ko‘radi, o‘zi esa uyda 80 yoshli qaynonasi va bolalarga qaraydi. Oila maktab, bog‘cha va kundalik xarajatlarni qoplash uchun qarindoshlardan qarz olishga majbur bo‘lgan.

Aholi Prezident tashabbuslari joylarda qanday ijro etilayotgani, ayniqsa, bunday loyihalarning keyingi taqdiriga ham e'tibor qaratsa, deb umid bildirmoqda.