Turdimov “kadrlar paketi”ni o‘zi bilan olib yuradimi?

So‘nggi yillarda Sirdaryo viloyatida kuzatilayotgan boshqaruv amaliyotida xavotirli bir tendentsiya tobora oddiy holga aylanib bormoqda. 

Gap hokim Erkin Turdimov qaerga tayinlanmasin, u bilan birga avvaldan shakllangan “o‘z odamlari”, shartli aytganda, “kadrlar paketi” ham ko‘chib yurishi haqida ketmoqda.

Lavozim o‘zgaradi, hudud almashadi, ammo kadrlar tarkibi va ish uslubi deyarli o‘zgarmasdan qolaveradi. Bu esa boshqaruvda shaxs omilining institutsional yondashuvdan ustun qo‘yilayotganini ko‘rsatadi.

Buni aniq misolda ham ko‘rish mumkin. Turdimovning Samarqanddagi rahbarligi davrida “o‘sgan”, jamoatchilikka tanila boshlagan va ayni paytda Kattaqo‘rg‘on tumani tibbiyot birlashmasi boshlig‘i sifatida ishlab kelayotgan Vohid Xudoyqulovning yaqin orada Sirdaryo viloyati sog‘liqni saqlash boshqarmasiga rahbar etib tayinlanishi kutilmoqda.

Bu holat bir qarashda oddiy kadr almashinuvidek ko‘rinishi mumkin. Ammo masala chuqurroq. Agar muayyan hududdagi tizim faqat rahbar bilan kelgan kadrlar orqali “ishlaydigan” bo‘lsa, demak, muammo alohida shaxslarda emas, institutsional boshqaruvning zaifligida.

Tashkilot rahbarsiz yoki “o‘z jamoasi”siz ishlay olmasa, u holda tizim mustaqil emas, shaxsga bog‘liq bo‘lib qoladi.

Bu yerda mantiqiy savol tug‘iladi. Sirdaryo viloyatida yetarli bilim va tajribaga mahalliy mutaxassislar rostdan ham yo‘qmi?

Yoki boshqa hududdan kelgan yosh kadr Sirdaryo tibbiyoti rivoji, shifokorlar va xodimlar uchun munosib shart-sharoit yaratilishini mahalliy mutaxassislardan ko‘ra ko‘proq istaydimi?

Kadrlar siyosatida bunday yondashuv uzoq muddatda hududiy kadrlar salohiyatini so‘ndirish, tashabbus va mas'uliyatni pasaytirish xavfini tug‘diradi.

Tizim esa shaxslarga emas, qoidalarga, ochiq raqobatga va mahalliy resurslarga tayanilgandagina barqaror bo‘lishi mumkin.