Termizda afg‘on fuqarosi hindistonlik harbiyni pichoqlab o‘ldirdi

Surxondaryo viloyatining Termiz shahrida 14 yanvar — Vatan himoyachilari kuni bayram qilingan oqshomda qonli voqea sodir bo‘ldi. Olingan ma'lumotlarga ko‘ra, shahardagi afg‘on tadbirkorlari tomonidan boshqariladigan kafe-barlardan birida Hindiston Qurolli Kuchlari zobiti va afg‘on fuqarosi o‘rtasida kelib chiqqan janjal o‘lim bilan yakunlangan.

Guvohlarning so‘zlariga ko‘ra, hodisaga hind harbiysining kafedagi afg‘on qiziga nisbatan qilgan noo‘rin xatti-harakatlari sabab bo‘lgan. Qizning sha'nini himoya qilish maqsadida vaziyatga aralashgan afg‘on yigiti va zobit o‘rtasida keskin nizo kelib chiqqan. Natijada, afg‘on fuqarosi hind harbiysiga pichoq bilan og‘ir jarohat yetkazgan.

Ma'lum qilinishicha, mazkur zobit O‘zbekiston va Hindiston o‘rtasidagi ikki tomonlama mudofaa sohasidagi hamkorlik hamda tajriba almashish dasturi doirasida Termizga kelgan. U hududdagi harbiy qismlarda malaka oshirish va amaliyot o‘tash bilan shug‘ullanayotgan bo‘lgan.

Hozirda mutasaddi idoralar tomonidan surishtiruv ishlari olib borilmoqda. Rasmiy ma'lumotlar hozircha e'lon qilinmadi.