Buxoro Davlat Texnika Universitetidagi shubhali shartnomalar

Eltuz tahririyatiga Buxoro davlat texnika universitetida davlat xaridlari jarayonlarida kuzatilayotgan shubhali holatlar yuzasidan murojaat kelib tushdi. Murojaatda ta'kidlanishicha, universitetda bunday shartnomalar allaqachon oddiy holga aylanib ulgurgan.

Ma'lum qilinishicha, universitetning iqtisodiy ahvoli og‘ir bo‘lishiga qaramay, piar ishlari to‘xtamaydi. Doimiy ravishda turli mehmonlar qabul qilinib, ularda universitet haqida ijobiy tasavvur shakllantirish maqsadida milliardlab so‘m byudjet mablag‘lari sarflanayotgani aytilmoqda.

Murojaat muallifining qayd etishicha, so‘nggi ikki yil ichida universitet tomonidan yuz milliard so‘mdan ziyod byudjet mablag‘lari samarasiz yo‘nalishlarga sarflangan. Buni amalga oshirilgan davlat xaridlari ro‘yxatlari orqali ham ko‘rish mumkin. Eng achinarlisi, bu holatdan viloyat va respublika darajasidagi mutasaddilar xabardor ekani aytilmoqda.

Shuningdek, universitet rahbariyati mavjud muammolarni yashirish va “chiroyli ko‘rsatish”ni odatga aylantirgani, bu borada respublikada iqtisodiy sohani nazorat qiluvchi va Senatda ta'sirga ega shaxslarga tayanib ish tutayotgani haqida da'volar bildirilgan.

Universitet jamoasi esa Shavkat Mirziyoev tomonidan Oliy Majlisga yo‘llangan murojaatnomada aytilgan qat'iy talab va printsiplar amalda ijro etilishini, ayniqsa, bu jarayon aynan Buxoro davlat texnika universitetidan boshlanishini kutmoqda.

Eltuz tahririyati mazkur holatlar yuzasidan universitet rahbariyati va mutasaddi idoralardan rasmiy munosabat va izoh kutishini ma'lum qiladi.