Hukumat narxlarni muttasil oshirishni rejalashtiryapti

Yaqin kunlarda O‘zbekistonda qimmatchilik boshlanishi haqida aholi o‘rtasida shu kunlarda ancha keng tarqalgan xavotirning asossiz emasligini hukumatning o‘zi tasdiqladi.

Hukumat portalida elektr energiyasi, gaz va benzin narxi oshishi haqidagi qaror loyihasi e'lon qilindi.

Qaror loyihasiga ko‘ra, O‘zbekistonda eng ommabop bo‘lgan Ai-80 markali benzin narxi 16 noyabrdan hozirgi 3800 so‘mdan 4000 so‘mga oshiriladi. Elektr energiyasi narxi esa 1 KVt soat uchun amaldagi 228 so‘mdan 331 so‘mga, 2019 yil 1 iyundan esa 370 so‘mga yetadi.

Gaz narxi esa avvaliga 1 noyabrda, keyingi safar 2019 yil 1 iyundan qimmatlashishi rejalashtirilgan.

“Bu hali boshlanishi,- dedi Iqtisodiyot vazirligi xodimi “Eltuz” bilan suhbatda. – Bundan keyin energiya manbalari narxi doimiy oshib borishini kutavering”.

Uning so‘zlariga ko‘ra, hozirgi vaqtda Xalqaro valyuta jamg‘armasi O‘zbekistondagi islohotlarni qo‘llab-quvvatlashni davom ettirish uchun hukumatdan narxlarni bosqichma-bosqich oshirib borishni talab qilmoqda.

“XVJ o‘zi kredit bermoqchi bo‘lgan barcha rivojlanayotgan davlatlarga shunday shart qo‘yadi. Shuning uchun agar biz islohotlar o‘tkazishda bu jamg‘armaning kreditlariga suyanishni istasak, uning talablariga bo‘ysunishga majburmiz”, dedi vazirlikdagi manba.

“E'tibor bergan bo‘lsangiz, prezidentimiz endi hokimiyat tepasiga kelganda imkon qadar narxlarni oshirmaslikka harakat qilib keldi. Lekin endi bu siyosatdan voz kechiladi”, dedi manba “Eltuz”ga.

Bundan avvalroq mahalliy OAVda O‘zbekistonda energiya manbalari, ya'ni elektr energiyasi, gaz, benzin narxi boshqa davlatlarnikidan ancha arzonligi haqida ketma-ket maqolalar bosila boshlagandi.

Endilikda bu maqolalar jamoatchilik fikrini shakllantirish, ya'ni aholini  qimmatchilikka tayyorlash maqsadida chop etilgani oydinlashdi.

Chunki hukumatning narxlar oshishi haqidagi qarori loyihasi aynan shu kabi maqolalar ko‘paygandan so‘ng e'lon qilindi.

Bundan avvalroq Markaziy bank qayta moliyalash stavkasini amaldagi 14 foizdan 16 foizga ko‘targandi.

MB bu o‘zgarishning sabablaridan biri sifatida “ma'muriy tartibga solinadigan narxlarning kutilgan darajaga nisbatan yuqoriroq oshirilishi, shuningdek, elektr energiyasi va tabiiy gaz tariflarining bozor sharoitlariga moslashtirilishining kutilayotganligi”ni ko‘rsatib o‘tgandi.

Ta'kidlash kerakki, energiya manbalari narxining bir qarashda arzimas oshirilishi ichki bozorda sezilarli qimmatlashuvga olib keladi. Bu har doim kuzatilib kelinayotgan holat.

Shuning uchun energiya manbalari narxining navbatdagi qimmatlashuvi ham oziq-ovqat, kiyim-kechak, turli kundalik mahsulotlarning narxi sezilarli darajada oshishiga sabab bo‘lishini kutish mumkin.

Bahodir Sharif
Eltuz.com