«Yo o‘zimiz o‘chirganmiz, yoki «tepadan» o‘chirtirishgan»

Boya saytda firibgarlik aybi bilan qo‘lga olingan mansabdor haqida bir maqola paydo bo‘ldi. Keyin kirib qarasam, maqola o‘chirtirilgan. Va mana bunday istehzoli yozuv turibdi: – «Maqolani topa olmadingizmi. Yo texnik xato sabab o‘zimiz o‘chirtirganmiz yoki «tepadan» o‘chirtirishgan»).

Minbar, mayli, kulgu orqali tsenzura haqida xabar qilyapti, lekin so‘nggi paytlar OAVga ta'sir o‘tkazish kuchaymoqda. Kuni kecha bir qator OAV va blogerlarning telegram kanalidan bir umumiy mavzudagi maqolalari o‘chirildi. Keyin esa ularga bosim o‘tkazib majburan o‘chirtirilgani haqida tarmoqda ma'lumotlar paydo bo‘ldi. Bir nimalar bo‘lyapti ishqilib.

Buning fonida blokdan chiqarilgan saytlar haqidagi xabar ham tatimadi. Chunki hammasi ham blokdan chiqmadi. Tanlab-tanlab blokdan chiqarishdi.

O‘zi ikki yil deganda OAV erkinligi bo‘yicha indeksda zo‘rg‘a vaziyatni yaxshilagan edik. Yana orqaga qaytishlar bo‘lyapti. Yoki so‘z erkinligini imitatsiya qilayotganimizni tan olaylikda, avvalgiday tinch, ovoz chiqarmay yashaylik yoki haqiqatda erkin bo‘laylik. Tepadan qo‘ng‘iroqlar kabi eski rejimning usullarini qo‘llamasdan.

Vakolatlilarga insof va idrok tilab qolaman.

Nozim Safarov
bloger-shoumen