Rossiya tajovuzi

Rossiyaning Ukrainaga tajovuzi butun dunyo uzra quyuq qora bulutdek bo‘lib turibdi. To‘satdan chaqmoq chaqib, to‘fon boshlanadigandek. G‘arb matbuotida bosh mavzu shu. G‘arb diplomatiyasi motori ham bor quvvatiga ishlayapti.

Ammo, MDH davlatlari hukumatlari, Markaziy Osiyo rahbarlari aftidan jim. Uch kun avval Moskvada Putin bilan uchrashgan qozoq prezidenti saytida ham uchrashuvda Ukraina biron marta tilga olingani aytilmagan. O‘zbekiston va Qirg‘iziston prezidentlari saytlari ham mavzuni chetlab o‘tyapti. Balki yopiq eshiklar ortida bir gap bo‘layotgandir, lekin hozirgi o‘ta qaltis vaziyatda ochiq ritorika va faol diplomatiya ko‘proq ish berishi mumkin.

Ko‘p tahlillardan ayon bo‘lishicha, Rossiya Ukrainaga urush ochsa, uyog‘iga boshqalar neytral qolishi qiyin bo‘ladi. Rossiyaga qarshi tayyorlanayotgan sanktsiyalar kuchli bo‘lishi kutiladi va bu nafaqat Markaziy Osiyo davlatlari iqtisodiga, balki rahbarlarining xalqaro sahnadagi bor obro‘yi va istiqbollariga zarba berishi xavfi katta. Yemagan oshingga, degandek. Qiziq, O‘zbekiston hukumati qanday mavqeda hozir va urush boshlanib qolgan taqdirda ko‘rish kerak bo‘lgan choralar haqida o‘ylayaptimikan?

Jurnalist Ibrat Safo

(ijtimoiy tarmoqdan)