Rus politsiyasi qo‘lida nobud bo‘lgan go‘dak

Bugun dunyo matbuoti Rossiya migratsiya xizmati va politsiyasi ushlagan tojik oilasining olib qo‘yilgan besh oylik emizikli bolasi Umarali Nazarov o‘limi haqida yozmoqda.
Sankt Peterburgda migratsiya qonunchiligini buzganlikda ayblangan tojik oilasining emizikli bolasi olib qo‘yiladi. Ertasi esa ular farzandining o‘lgani haqidagi mash'um xabarni eshitishadi.

Chaqaloq yupun ahvolda bo‘lgani, och qolgani va o‘limidan oldin uzoq vaqt yig‘lagani aytiladi. Hozirda “ehtiyotsizlik sabab” bolaning o‘lgani yuzasidan jinoiy ish qo‘zg‘algan. Biroq, bu safar ham na jamoatchilik, na bolaning ota onasi aybdorlarning tegishli jazo olishiga ishonishmayapti.

Bu ham yetmagandek, jinoyatchilar qolib nobud bo‘lgan norasidaning jabrdiyda ota onasi – Rustam Nazarov va Zarina Yunusovalar bugun gumon ostiga olinmoqda. Ularga “bola tarbiyalash vazifasini bajara olmaganlik” aybini ilishga urinishlar bo‘lmoqda.

Ayni paytda Markaziy Osiyo va tojik diasporasining voqeaga munosabati turlicha. Xususan,”Tojikiston” jamg‘armasi raisi, “Migratsiya va qonun” huquq markazi raxbari Gavhar Jo‘raeva hamyurtlaridan “Rossiyani fashistlar mamlakati” deya ayblamaslik bayonoti bilan chiqqan.

Biroq, tojik diasporasi, Piterburglik huquq himoyachisi Yevgeniya Kulakovaning yakka o‘tkazgan piketi hisobga olinmasa, shusiz ham jim. O‘zbek, qirg‘iz, qozoq, turkmanlardan iborat Markaziy Osiyo hamjamiyatining boshqa vakillari munosabati ham shunga hamohang.

Eltuz.com