Qovun qovundan rang olib…

Maqolada yozilishicha, xitoylik jurnalistlar «Farg‘ona shahrining qiyofasi, yam-yashil maydonlar, kashtanlar xiyoboni, yangi bunyod etilgan inshootlar, suv sporti saroyini ko‘rib, ko‘zlari quvnagan» va Shensi viloyati markazi «Sian shahri ko‘chalari tor, odamlar doimo shoshib yurishi»dan yozg‘irgan hamda Farg‘ona shahrining San'at xiyobonida ko‘ksini to‘ldirib nafas olib, bu o‘lkada yashovchilarga havasi kelgan.

«Shensi jibao» gazetasi bo‘lim mudiri esa «O‘zbekistonda tom ma'noda so‘z va matbuot erkinligiga erishilgani, jurnalistik faoliyatni tashkil etish va axborot olishni kafolatlaydigan qonunlar ishlab turganini katta qiziqish bilan o‘rgangani»dan quvongan.

Har holda maqola muallifi, amaldagi hukumatga bo‘lgan «mehri»ni har xil nashrlar orqali boshqalar bilan ulashishga ishtiyoqi baland jurnalist Muhammadjon Obidov (bir vaqtlar «Axborot» muxbiri bo‘lgan) xitoyliklarning fikrlarini shunday bayon etadi.

Xitoy matbuotidagi tsenzura haqida ko‘p yoziladi. Bu yerda tsenzura boshqa totalitar yoki avtoritar davlatlardagidan farq qilmasligi aytiladi.

Shuning uchun xitoylik jurnalistlar haqiqatan ham shunday gaplarni aytgan bo‘lsa, «qovun qovundan rang olishi»ning yorqin namunasiga guvoh bo‘lish uchun bundan ortiq misolni topish qiyin ekanligiga amin bo‘lamiz.

Bundan tashqari, so‘nggi 10 yillikda shaharsozlikka dunyoning mana-man degan davlatlariga o‘rnak bo‘layotgan Xitoyning jurnalistlari Farg‘onadagi o‘zgarishlardan hayratga tushganini o‘qib: «Bular jinni-pinni bo‘lib qolgani yo‘qmi? Yoki yaqin tarixini qo‘msashyaptimi», deb ham o‘ylab qoladi odam.

Eltuz.com