O‘zbek matbuotining kechmish haqidagi gaplari bugunni aks ettiradi

Surxondaryoda o‘tkazilgan «Kim edigu, kim bo‘ldik, ertaga qanday yuksak marralarni egallashimiz kerak?» mavzuidagi tashviqot tadbirlari haqida maqola e'lon qilgan «Hurriyat» gazetasi go‘yoki bugunga ko‘chgan kechagi kun haqida yozadi.

Muallif sovet davri ko‘rguliklarini qoralarkan: «Qatag‘onlar, qama-qamalar va adoqsiz xo‘rliklar bilan butun el-ulusni qo‘rqitish, inson qadr-qimmatini yerga urish mustabid tuzumning asosiy tamoyili edi. Bu zulm va bedodliklar u yoki bu ko‘rinishda 1991 yilga qadar ustma-ust davom etdi», deydi.

Mustaqillik mafkurasi doirasidan chiqib, oq-qora haqida sal fikrlay olish qobiliyatiga ega insonlar aslida sovet davridagi o‘sha ko‘rguliklar hozir ham muallif aytgani kabi «u yoki bu ko‘rinishda» davom etayotganini anglay olsa kerak nazarimizda.

Maqolada davom ettiriladi: «Hali suyagimiz qotmasdan, ya'ni o‘n-o‘n bir yoshdan paxta yaganaga, so‘ng chopiqqa chiqardik. Keyin esa kuzdan to dekabr oyigacha paxta terimida qatnashardik. … qishloq bolasi borki, paxta dalasidan beri kelmasdi».

Bugun ham «paxta dalasidan beri kelmayotgan qishloq bolasi» yo‘qmi? Har yili o‘qishdan paxta dalasiga haydalayotgan kollej va universitet talabalarichi? Yoki ularning suyagi qotib bo‘lganmi? Ularni o‘qishdan mosuvo qilib, «ko‘ngilli ravishda» dalaga haydasa bo‘laveradimi?

Yoki gazetada yozilganidek: «Zotan, yoshlarimizga yaratilayotgan shart-sharoitlar, qulayliklar shuni taqozo etadi»mi?

Eltuz.com