Mahalla demokratik organmi?

«Hurriyat» gazetasida mahalla to‘g‘risida e'lon qilingan maqolada «sovet davrida qaergadir «spravka» kerak bo‘lgandagina murojaat qilinadigan idora» bo‘lgan mahalla mustaqillik yillarida mahalliy o‘zini o‘zi boshqarishning «demokratik organi» sifatida qayta tiklangani ta'kidlanadi.

Qo‘shni davlatda sababsiz bir oy o‘qishga bormagan o‘quvchi ichki ishlar xodimlari yordamida maktabga qaytarilganini internetdan o‘qib qolganini bildirgan muallif bunday holat yurtimizda yuz bersa, oila va mahallaning o‘zida hal etilishini mamnuniyat bilan yozadi.

Albatta, yuqoridan tekshirish kelishidan oldin bechora o‘qituvchilar davomatni yaxshilash uchun uyma-uy chopib yurishi haqida gap-so‘z yo‘q maqolada. Bo‘lmaydi ham. Chunki maqsad mavjud kamchiliklarga e'tibor qaratish emas, balki «zamonamdan o‘rgilay» ruhida bitik qoralash ekani yaqqol ko‘rinib turibdi.

Muallif bugungi kunda mahalla ilgari mahalliy hokimiyat organlarining vakolatiga tegishli bo‘lgan 30 dan ziyod ijtimoiy-iqtisodiy ahamiyatga molik vazifalarni bajarayotganini iddao qiladi.

Maqolada hukumatning xalqni mutelik va qo‘rquv iskanjasida tutib turishga qaratilgan nazorat mexanizmida mahalla qanday rol o‘ynayotgani masalasiga oydinlik kiritilmagan.

Eltuz.com