Vohid Amonov: Vaqtida operatsiya qilinganida xotinim tirik bo‘lar edi

3 iyul kuni Beshariq markaziy shifoxonasiga keltirilgan 25 yoshli ayol vafot etdi.

Bu haqda Eltuz nashriga murojat etgan ayolning eri Vohid Amonovga ko‘ra, fojea xotiniga birinchi tibbiy yordam kechiktirilgani, shifokorlarning loqaydligi tufayli yuz bergan.

U xotinini avval ginekologga, keyin soat uchlarda tug‘uruqxonaga keltirishganini aytadi.

«Dardim ichimda shuning uchun birinchi bor sizga murojaat qildim. Agar vaqtida birinchi tibbiy yordam ko‘rsatishganida xotinim tirik qolgan bo‘lardi», deydi u.

UZI tekshiruvidan so‘ng uni zudlik bilan operatsiyaga yotqizilishi kerakligini aytishgan. Biroq analizlari chiqmagach, operatsiya yana orqaga surilgan.

Marhumaning eriga ko‘ra, uning analizlarini chiqarmay, Oliy majlisdan tekshiruv keldi, deb laborotoriyani yopib ketib qolishgan.

«Dadam operatsiya xonasi eshigi oldida kelinining ovozini eshitib, haliyam operatsiya boshlamadinglarmi deb to‘polon ko‘tarib, u yoq bu yoqlarga qo‘ng‘iroq qila boshladi…» deya davom etadi Amonov.

Bu orada ayolning bachadon trubkasi yorilib ketgan, 18.30 yaqin operatsiya boshlangan.

«Alam qilarkanda. Hech bo‘lmasa birortasi til uchida bo‘sa ham ta'ziya bildirmadi. operatsiya tugashi bilanoq ikki yordamchisi kelib, biz charchadik operatsiyada kechasi bilan uxlamadik, rozi qilarsiz, hech bo‘masa qo‘l haqi bering deyishdi. Men hozircha pulim yo‘q ayolim tuzalib ketsa beraman desam, ular to‘ng‘illab ketishdi» deydi Vohid Amonov.

Uning xotini ikki soat ichida bir yarim litr qon yo‘qotib vafot etdi, besh va uch yashar ikkita qizi esa onasiz qoldi.

Eltuz.com