Bojxona boshlig‘i $5000 pora bilan qo‘lga olindi

Farg‘ona viloyat chegara bojxona posti rahbari tadbirkordan 5000 dollar pora olayotganida qo‘lga olindi

Rasmiy xabarlarda Andijon viloyatining Baliqchi tumanida tug‘ilgan, Farg‘ona viloyatidagi chegara bojxona postlaridan biriga rahbar etib tayinlangan shaxs o‘z mansab vakolatlarini suiiste'mol qilib, jinoyatga qo‘l urgani bildirilmoqda.

Muqaddam chegarani noqonuniy kesib o‘tgani uchun sudlangan shaxs sobiq post rahbariga Qirg‘izistondan uyali aloqa telefonlarini olib o‘tish va katta foyda ko‘rish taklifini bergan.

Mansabdor shaxs 80 dona telefonni hech qanday tekshiruv va bojxona to‘lovlarisiz ichkariga o‘tkazib berish evaziga 5000 AQSh dollari hamda bitta telefon apparatini sovg‘a sifatida talab qilgan.

Davlat xavfsizlik xizmati Farg‘ona viloyati boshqarmasi tomonidan o‘tkazilgan tezkor tadbir davomida, u Farg‘ona tumanining «Mindonobod» mahallasi hududida so‘ralgan pul va telefonni olayotgan vaqtda ashyoviy dalillar bilan qo‘lga olindi.

Mazkur ish jinoyat ishlari bo‘yicha Quva tumani sudida ko‘rib chiqildi. Sud hukmiga ko‘ra, ayblanuvchi O‘zbekiston Respublikasi Jinoyat kodeksining 210-moddasi 1-qismi (Pora olish) bilan aybdor deb topildi.

Unga 3 yil muddatga bojxona tizimi va davlat ishtirokidagi tashkilotlarda mansabdorlik va moddiy javobgarlik lavozimlarida ishlash huquqidan mahrum qilingan holda, 4 yil muddatga ozodlikdan mahrum qilish jazosini manzil-koloniyalarda o‘tash belgilandi.

Rasmiy manbalar tomonidan ushbu holat sog‘lom tadbirkorlik muhitiga putur yetkazishi va davlat iqtisodiyotiga zarar keltirishi ta'kidlanmoqda.