Tailandda rus kemasi halokatga uchradi

11 yanvar kuni Tailandning Andaman dengizida, aniqrog‘i Pxi-Pxi orollari yaqinida turistlarni olib ketayotgan Rossiya kemasi halokatga uchradi. Sayyohlik kemasi baliqchilar kemasi bilan to‘qnashib ketgan va oqibatda rus kemasi suvga g‘arq bo‘lgan.

Rossiyaning Pxuketdagi bosh konsulligi va mahalliy OAV xabarlariga ko‘ra kema bortida jami 52 nafar yo‘lovchi va 3 nafar ekipaj a'zosi bo‘lgan. Yo‘lovchilar orasida Rossiyaliklardan tashqari, Qozog‘iston, Qirg‘iziston va O‘zbekiston fuqarolari ham bo‘lgan. 

Dastlabki ma'lumotlarga ko‘ra, kemada bo‘lgan jumladan 4 nafar o‘zbekistonlik tirik qolgan va ularga kerakli tibbiy yordam ko‘rsatilgan.

Halokat oqibatida qurbonlar borligi va turli darajadagi jarohat olgan 20 dan ortiq kishi shifoxonaga yotqizilgan. Ularga Rossiyaning sug‘urta shirkatlari tovon puli ajratishi kerakligi aytilmoqda.

Hozirda Tailand rasmiylari voqea yuzasidan tergov ishlarini olib bormoqda. To‘qnashuvning asosiy sabablari sifatida rus kemasining texnik nosoz bo‘lgani bildirilmoqda.