Jukovskiy umrbod qamoqqa hukm qilindi

Shvetsiyaning Sundsvall shahrida o‘tgan appelyatsiya mahkamasiga ko‘ra Obid Qori Nazarov joniga qasd qilgan toshkentlik yollanma qotil Yuriy Jukovskiyga berilgan jazo kuchaytirildi.

Izlari o‘zbek rejimiga borib taqaluvchi siyosiy suiqasd yuzasidan 9 fevral kuni Shvetsiyada boshlangan mahkama shved jamoatchiligi va matbuoti diqqat markazida bo‘ldi.

Shu o‘rinda ayrim Internet nashrlar bevosita sud zalidan jonli reportajlar olib borganini aytish mumkin.
Shved telekanali SVT jurnalisti mahkamani yoritarkan, bu ish Londonda yuz bergan Litvinenkoga qilingan qotillikka paralellar keltirdi.

57 yoshli Obid qori Nazarov bundan to‘rt yil burun, 2012 yilning fevralida Stromsund shahridagi uyi yaqinida otib ketilgandi.

Imom tirik qolgan, ammo boshidan og‘ir yaralangani bois uzoq vaqtdan buyon komada qolmoqda.

Umrbod qamoq jazosi Shvetsiyada oliy jazo hisoblanadi.

(Suratda Yuriy Jukovskiy o‘z sherigi Baxodir Po‘latov bilan)
Eltuz.com