Buxoro neft zavodi ishchilari bosim va adolatsizlikdan shikoyat qilmoqda

Buxoro neftni qayta ishlash zavodida mehnat qilayotgan oddiy ishchi-xodimlar O‘zbekiston neft-gaz sohasi rahbariyatiga murojaat bilan chiqdi. Ularning ta'kidlashicha, zavodda ishchilar muntazam ravishda bosim ostida ishlashga majbur bo‘lmoqda.

Murojaatda aytilishicha, zavod rahbariyati tomonidan tez-tez o‘tkazilayotgan asossiz tekshiruvlar ishchilarning moddiy ahvoliga salbiy ta'sir ko‘rsatmoqda. Arzimagan maosh evaziga kun kechirayotgan ishchilarning so‘zlariga ko‘ra, bunday tekshiruvlar ayrim hollarda maoshdan ushlab qolish yoki boshqa turdagi jazolarga sabab bo‘layapti.

Ishchilar rahbariyat va quyi bo‘g‘in xodimlari o‘rtasidagi katta maosh farqiga ham e'tibor qaratgan. Ular keltirgan raqamlarga ko‘ra, ayrim rahbarlar oyiga 20–25 million so‘m maosh olayotgan bir paytda, zavoddagi qora mehnat bilan shug‘ullanuvchi ishchilar 4–5 million so‘m atrofida oylik bilan cheklanib qolmoqda.

Murojaat mualliflarining ta'kidlashicha, o‘z haq-huquqini talab qilgan ishchilar turli bosimlarga uchramoqda. Shu bois ular sohadagi mas'ul rahbarlardan ishchilar maoshini oshirish, asossiz bosim va tekshiruvlarga barham berish bo‘yicha amaliy yordam so‘rab qolgan.