Firibgarlardan avtomobil harid qilganlar jazolandi

Sud-huquq tizimi isloh qilinayotgani haqidagi ura-urachilikning yangi to‘lqini ko‘pchigan shu kunlarda «XXI asr» gazetasi yana bir mavzuni ko‘targanki, sohadagi eng katta muammolardan biri yalt etib ko‘zga tashlangan.

«Farg‘onada «jinoyat quroli», Samarqand va Qashqadaryoda «ashyoviy dalil»mi? sarlavhali bu maqolaning mazmunidan ma'lum bo‘ladiki, bir guruh firibgarlar mamlakatga noqonuniy yo‘llar bilan mashinalar olib kirib, ularni fuqarolarga pullagan.

Firibgarlik fosh etilib, Farg‘ona, Samarqand va Qashqadaryoda sud jarayonlari bo‘lib o‘tgan.

E'tiborlisi shundaki, Samarqand va Qashqadaryoda bu firibgarlikni ko‘rib chiqqan sudlar davlat notarial idoralari tomonidan rasmiylashtirilgan mashinalarni ularni qonuniy yo‘l bilan sotib olgan egalariga qaytarib berish haqida hukm chiqargan.

Farg‘ona sudi esa xuddi shu mazmundagi ish yuzasidan firibgarlardan qonuniy yo‘l bilan mashina xarid qilgan 18 jabrdiydani qon yig‘latib, mulkini musodara qilish qaroriga kelgan.

Bir xil ish yuzasidan ikki xil hukm chiqaradigan sudlarning hukmlari nimadan darak beradi?

Balki sudlarning qonunga emas, boshqa manfaatlarga asoslanishidan darak emasmi bu?

Maqola muallifi ham shunga ishora berishga uringan shekilli: «18 nafar jabrdiydaning yemagan somsaga to‘lagan pullarini qaytarish – mo‘'jiza bilan barobar», deya xulosa qiladi.

Bahodir Sharif
O‘zbekistonlik gazetxon tahallusi
Eltuz.com