16 asr obidalari vayron bo‘layotgan ko‘chaga Karimov nomi berildi

«Milliy tiklanish» gazetasi (24.05) Buxorodagi qadimiy ko‘chaga Karimov nomini berish haqidagi partiyaning taklifi viloyat kengashi tomonidan «bir ovozdan ma'qullangani»ni g‘ururlanib yozdi.

Eltuz nashri mart oyida prezident Mirziyoevning Karimov nomini abadiylashtirish to‘g‘risidagi qarorini bajarishda «Milliy tiklanish» partiyasi bosh «tashabbuskor» bo‘layotgani haqida yozgan edi.

Unda bu partiyaning Buxoro viloyatidagi faollari mazkur qadimiy shahardagi ko‘chalardan biriga Islom Karimov nomini berish tashabbusi bilan chiqqani aytilgandi.

Shuningdek, gazeta qadimiy Buxoro obidalari 2000 yilda ta'mirlanganiga qaramay, bugungi kunda ayanchli ahvolga kelib qolgani haqida yozgan.

Xususan, majmua tarkibidagi bir obidaning koshinlari tushib ketgan, hujralari ta'mirtalab bo‘lib qolgan. Yana bir obidaning poydevori to‘kilib, devorlari qabrlar ustiga qulab tushgan.

16 asr obidasi Chor Bakrning xarobaga aylanishi fonida, Buxoroning tarixiy ko‘chalariga Karimov nomini berilishi o‘zbek jamiyati qay tomonga qarab evrilayotganini anglatadi.

Bahodir Sharif
O‘zbekistonlik gazetxon tahallusi
Eltuz.com