Qo‘qonlik Iqbol tabib sudga berildi

Xalq orasida aprs sifatida tanilgan Iqbol Soliev sudga berildi. Bu haqda 16 dekabr kuni Farg‘ona viloyati IIB matbuot xizmati xabar berdi.

Uning aprslik faoliyati o‘rganilganda 2020 yil avgustida soliq organlaridan «Xalq tabobati» faoliyat turi bo‘yicha ro‘yxatdan o‘tgan bo‘lsa-da, O‘zbekiston xalq tabobati assottsiatsiyasi tomonidan berilgan guvohnoma muddati 2024 yil dekabrida tugagani ma'lum bo‘lgan.

Unga nisbatan Qo‘qon shahar IIB tomonidan tegishli tartibda hujjatlar rasmiylashtirilib, Jinoyat ishlari bo‘yicha Qo‘qon shahar sudiga yuborilgan. Sud tomonidan 2025 yil 10 yanvar kuni Ma'muriy javobgarlik to‘g‘risidagi kodeksning 59-5-moddasi (xalq tabobati to‘g‘risidagi qonunchilikni buzish) 1-qismi bilan 7,5 million so‘m miqdorida jarima jazosi tayinlangan.

Shuningdek, uning ijtimoiy tarmoqlardagi chiqishlari fuqarolarning e'tirozlariga sabab bo‘lgani inobatga olinib, IIO xodimlari tomonidan rasmiy ogohlantirilgan.

Biroq Iqbol Soliev takroran o‘z faoliyatini davom ettirib, videoroliklarni ijtimoiy tarmoqlarga joylab kelgani aniqlanib, 27 noyabr kuni Qo‘qon shahar IIB tomonidan unga nisbatan Ma'muriy javobgarlik to‘g‘risidagi kodeksning 59-5-moddasi 3-qismi (huquqbuzarlik ma'muriy jazo chorasi qo‘llanganidan keyin bir yil davomida takroran sodir etilishi) bilan hujjatlar rasmiylashtirildi hamda tegishli tartibda sud organiga yuborildi.

Xalq tabobati to‘g‘risidagi qonunchilikni buzish ma'muriy jazo chorasi qo‘llanganidan keyin bir yil davomida takroran sodir etilishi bazaviy hisoblash miqdorining 20 baravaridan 30 baravarigacha miqdorda (8 million 240 ming so‘mdan 12 million 360 ming so‘mgacha) jarima solishga yoki 15 sutkagacha muddatga ma'muriy qamoqqa olishga sabab bo‘ladi.

Xalq tabobati assotsiatsiyasi raisi Ro‘zimuhammad Xonnazarovdan munosabat kutamiz.