«Bu og‘ir zanjirni shaldiratmoqqa jur'at etgan senmi…»

Muhammad Solih shoir va siyosatchi. 1949 yil 20 dekabrda Xorazmning Urganch tumanida dunyoga kelgan. Toshkent Davlat Universitetining jurnalistika fakulteti va Moskvadagi Oliy adabiyot kurslarida tahsil olgan.

1977 yilda ilk she'riy kitobi chop etilgan Solih XX asr o‘zbek she'riyatiga g‘arb avangardchiligini olib kirgan shoir sifatida shuhrat kozondi.

Qo‘limda piyola, chordona qurib,
Kutaman, mudraydi horg‘in ko‘zlarim.
Yalqov qahr bilan pashshani qo‘rib,
Kutaman, kelmadi hali do‘stlarim.

Hali dushmanlarim to‘plangani yo‘q,
Yurishar uzilgan simlarni ulab.
Har holda, ulardan mening ko‘nglim to‘q,
Payt kelsa, bir-birin topajak ular.

Payt kelsa, bilmayman nega yarayman?
Qo‘limda piyola, chordona qurib,
Boshimni eggancha kunga qarayman:
Hali o‘nglamadi o‘zini zo‘rlik,
Qanotin yozmadi hali haqorat,
Hali qiyomiga yetmadi xo‘rlik.

Muhammad Solih
«Ozodlik ohanglari»