O‘zbekiston hukumati xorijlik jurnalistlarni taqiqlab, o‘z obro‘sini yo‘qotmoqda

O‘zbekiston prezidenti Shavkat Mirziyoev ikkinchi muddatga qasamyod qilganidan bir kun o‘tib, matbuot erkinligini himoya qilishga va'dalari ortidan hukumat xorijlik jurnalist faoliyatini taqiqladi.

7 noyabr kuni chegarachilar polshalik jurnalist Agneshka Pikulitskayaning O‘zbekistonga kirishini taqiqlashdi. Shu kuni tunda O‘zbekistonga kirishga huquqi yo‘qligini aytib uni Qozog‘iston chegarasida qoldirishgan.

“Jurnalistikada men har doim adolatli va xolis bo‘lishga harakat qilaman. Inson huquqlari va adolatsizlik haqidagi xabarlarim meni shunday ko‘rgiliklarga yetaklaydi, deb hech o‘ylamagandim”, dedi u Eurasianet nashriga bergan intervyusida.

Pikulitskaya O‘zbekistonda 30 kun vizasiz qolish talabi tufayli «kirdi-chiqdi» amalini bajarish uchun chegarani kesib o‘tgan. U avvalroq mamlakatni tark etgan va keyin darhol yangi vizasiz rejimni boshlash uchun qayta kirishga harakat qilgan, ammo bu safar unga kirishga ruxsat berilmagan.

Aftidan o‘zbek rasmiylari «yomon matbuot»ni mamlakatga kiritmaslik uchun prezident saylovi tugashini kutishgan, deya yozadi Eurasianet nashri.

«So‘nggi uch yil davomida men O‘zbekistonda yashadim va bu yurt mening o‘z uyimga aylandi. Hech bo‘lmaganda narsalarim, kiyim-kechaklarimni yig‘ishtirib olishimga ruxsat berishmagani juda alamli va adolatsizdir», dedi jurnalist o‘z intervyusida.

U tvitterda Toshkentdan uchishga 9-noyabrda ruxsat etishlari haqida yozgan edi.

Pikulitskaya uchun amaldorlar bilan bunday to‘qnashuv ilk bor yuz berayotgani yo‘q. «Eltuz» joriy yilning fevralida yozganidek, o‘zbek rasmiylari uning jurnalistik akkreditatsiyasini uzaytirishni rad etishgan. Keyinchalik esa uni mamlakatning ichki ishlariga aralashish, “fuqarolar sha'ni va qadr-qimmatini kamsitish”, “milliy va diniy adovatni targ‘ib qilish”da ayblashgan edi.

Pikulitskayaning o‘zi buni O‘zbekistondagi nozik masala bo‘lgan LGBTga mansub shaxslar haqidagi reportaji uchun qasd olish, deya hisoblashini aytadi.

Mustaqil siyosiy tahlilchi Alisher Ilhomov feysbukdagi sahifasida voqea yuzasidan munosabat bildirdi:

«Bu voqea O‘zbekiston rasmiylarining jurnalistlar, blogerlar va faollarga, shuningdek, panada qolishga majbur bo‘layotganlarga munosabati haqida o‘zimizni aldamaslik kerakligining yana bir tasdig‘idir.

O‘zbekiston rasmiylari zararsizlantirishga muvaffaq bo‘lgan, mamlakatdagi korruptsiya va inson huquqlari buzilishi tanqidchilarini yoki rejim bilan hamkorlik qilishga, u bilan parda ortidagi kelishuvlarga rozi bo‘lganlarnigina tan oladi», deya yozdi Ilhomov.

Eltuz.com