Denovda elektr infratizilmasi yangilanmoqda, ammo nogiron fuqarolar uylari chetda qoldi

Surxondaryo viloyati, Denov tumani, Katta Qarshi mahallasi aholisi elektr infratuzilmasi yangilanishida adolatsizlikka duch kelayotganini ma'lum qilmoqda.

2025 yilda davlat byudjeti mablag‘lari hisobidan mahallada yangi beton ustunlar va zamonaviy kabellar o‘rnatish ishlari boshlandi. Bu aholi turmush sharoitini yaxshilash uchun muhim qadam sifatida baholanmoqda.

Biroq mahallaning ayrim ko‘chalari, jumladan 4–5 ta xonadon, nogironligi bor fuqarolar istiqomat qiladigan uylar mazkur ishlardan chetda qoldirildi. Sababi — uy egalari tuman elektr tarmoqlari korxonasiga qo‘shimcha pul to‘lay olmagan.

Eng achinarlisi, ushbu xonadonlarda salkam yarim asr oldin o‘rnatilgan yog‘och ustunlar haligacha almashtirilmagan. Ular chirib, elektr simlari bilan birga inson hayoti uchun xavfli holatga kelgan. Bu ahvol bolalar, keksalar va nogiron fuqarolar hayoti uchun to‘g‘ridan-to‘g‘ri tahdid solmoqda.

Qolaversa, Katta Qarshi mahallasi “qizil hudud” sifatida belgilangan. Bu esa masalaning yanada jiddiy va dolzarb ekanini ko‘rsatadi.