Germaniya Putin rejimi qurboni qarindoshlarini deportatsiya qildi

Germaniya Berlinda o‘ldirilgan chechen dala qo‘mondoni Zelimxan Xangoshvilining qarindoshlarini  Gruziyaga deportatsiya qildi.

«Deutsche Welle» va «Exo Kavkaza» nashrlarining xabar berishicha, Xangoshvili oilasining 12 a'zosi, jumladan uch yil oldin Shvetsiyadan Germaniyaga ko‘chib kelgan ukasi Zurab Gruziyaga deport qilingan.

Bir kun avval politsiya uning Vyunsdorf (Brandenburg yeri) shahridagi kvartirasida tintuv o‘tkazgan, shundan so‘ng Zurab va qolgan qarindoshlar deportatsiya qilish uchun Berlin aeroportiga olib kelingan.

Avvalroq Germaniya hukumati Zurabga boshpana berishdan bosh tortgan, 2024 yilning kuzida esa sud uni yuborish qarorini tasdiqlagan.

Eslatib o‘tamiz, 2019 yilning avgustida rossiyalik killer Vadim Krasikov Berlin markazida Xangoshvilini otib o‘ldirgan edi. Keyinchalik u umrbod qamoq jazosiga hukm qilingan, biroq 2024 yil avgustida Moskva katta mahbuslar almashinuvi doirasida Krasikovni Rossiyaga qaytargan. Kreml uning FSB xodimi, «Alfa» maxsus bo‘linmasida xizmat qilganini tasdiqladi. Uni samolyot yonida shaxsan Putin kutib olgan edi.

Endi esa FSB agenti tomonidan o‘ldirilgan dala qo‘mondonining qarindoshlarini, Germaniya qotilning o‘zini Kremlga topshirganidan bir yil o‘tib, deportatsiya qilishmoqda. Bu yuridik rasmiyatchilik bilan yashirilgan siyosiy qarorga o‘xshaydi.

Rasman — «sud qarorini ijro etish». Aslida — Moskvaga Berlin keskinlikni xohlamasligi haqida navbatdagi ishorani yetkazish.