TVning asliga qaytishi – atavizmmi?

O‘tgan oyda MTRKda ro‘y bergan voqealar Bulgakovning «It yurak» qissasi qahramoni professor Preobrajenskiyning mashhur gapini eslatadi.

«Fan hali hayvonni odamga aylantirish yo‘lini bilmaydi. Ko‘rayapsizmi, men urinib ko‘rdim, u gapira boshladi, lekin ko‘p o‘tmay yana ibtidoiy holatiga qaytdi – atavizm!»

Alisher Xo‘jaevning raxbarlikka qaytishi bilan O‘zMTRKdagi o‘zgarishlar, jonli efirga chiqish harakatlariga barham berildi.

Eltuz nashri FB sahifasida izoh yozgan Ravshan Turdiev o‘zbek televideniesini qurigan darahtgan qiyosladi:

«Haqiqiy bog‘bon kelib, dorilab, jonlatirayotgan edi. Kuf-sufdan bo‘ldimi, Olloxdanmi, quridi. Bog‘bonning gapiga qaraganda, qurt tushgan, «odam» bo‘lmas emish. Kesib tashlab, boshqasini ekish kerak emish».

Shu yilning fevral oyida prezident Mirziyoev Alisher Xo‘jaevni ishdan olishi bilan Milliy teleradiokompaniyada sezilarli o‘zgarishlar boshlangandi.

Ammo so‘z erkinligiga o‘rganmagan O‘zbekistondagi hokimiyat tizimi mulozimlari jiddiy havotirga tushib qolishdi.

21 avgust kuni MTRK jurnalistlari bilan o‘tkazilgan yig‘ilishda Bosh vazir Abdulla Aripov Xalqaro press klub rahbari Sherzod Qudratxo‘jaev olib borayotgan jonli ko‘rsatuvlarni tanqid qilib, uni “haddidan oshib ketganlikda” aybladi.

23 avgustda esa «O‘zbekiston» telekanalidagi «Munosabat» ko‘rsatuvi ham jonli efir setkasidan olib qo‘yildi.

Bu kabi o‘zgarishlarni kadrlar almashuvida ham ko‘rish mumkin.

Avvaliga Alisher Xo‘jaev o‘rniga qo‘yilgan Hurshid Mirzohidov ishdan haydaldi.

2 avgust kuni esa Hurshid Mirzohidov ishdan olinib uning o‘rning Bobur Alixonov rais bo‘ldi.

Bir oy o‘tar o‘tmas, 29 avgust kuni Bobur Alixonov ishdan olindi va Alisher Xo‘jaev raislikka qo‘yildi.

Uning o‘rninga bo‘lgani aytilgan Xayrullo Nuriddinovning raxbarligi bor-yo‘g‘i uch kun davom etdi.

Shu bilan xalq jonli efirdan mosuvo bo‘ldi, o‘z muammolarini jamoatchilikka ochiq-oydin yetkazish imkoniyatidan mahrum etildi.

Atavizm holati yuz berdi – OAVni eski qolipga solish ilinjidagi kuchlar MTRKga qaytdi.

Rassom Tuz
Eltuz.com