O‘zbek madonnasi kelajagi yo‘q bolasini o‘ldirdi

O‘zining uch yashar o‘g‘lini bo‘g‘ib o‘ldirib, daraxtlar ostiga tashlab ketgan andijonlik Saidaxon Tillavoldieva 3 aprel kuni Toshkentda hibsga olindi.

Ijtimoiy tarmoq faollari keyingi yillarda avj olgan voqeadan shokda ekanliklarini yozishmoqda.

«O‘z bolasini sotish, tanasiga o‘nlab nina sanchish, bo‘g‘ib o‘ldirish, muzlatib o‘ldirib, axlatxonaga tashlab ketish millat fojeasiga aylandi!

Qonunchilik palatasi, Senat tirikmi?! Nega tegishli qaror, qonunlar qabul qilishmaydi? Ona, bola «priyutlari» ochilsa bo‘lmaydimi?! Biz oqibat bilan emas, sabablar bilan ishlashimiz kerak», deya izohlaydi voqeani o‘zbekistonlik faol Mirza Anvar.

Mahalliy telekanalning «Zamon» axborot ko‘rsatuviga intervyu bergan Tilavoldieva Toshkentda ish topishiga xalaqit bergani uchun bolasini bo‘g‘ib o‘ldirishga majbur bo‘lganini aytadi.

«Baribir bola ko‘chada xor bo‘lib o‘lardi. O‘ldirganimdan keyin bag‘rimga bosib o‘tirdim, kechirim so‘radim», deydi Tilavoldieva.

Eridan ajragan Tillavoldieva 23 martgacha otasining uyida yashagan. Keyin uyidagilar bilan janjallashib, o‘g‘li Firdavsni olib Toshkentga ishlagani ketgan.

Bolasi bilan poytaxtdan ish topa olmagan ayol o‘g‘lini tanishinikida qoldirish uchun Uchko‘prik tumaniga kelgan. Uni topolmagach, bolasini Qo‘qon-Toshkent avtobus bekatida o‘ldirib, jasadni archalar tagiga yashirganini aytadi.

Eltuz.com