Vazir o‘quvchilarning sazoyi qilinganini qoraladi

«O‘zbekiston 24» kanalining kiyinish madaniyati «tanqid qilingan» 12 sentyabr kungi «Xalqaro Press klub» ko‘rsatuvida TV jurnalistlarining o‘zlari etika qoidalarini qo‘pol buzishdi.

Shu kuni TV jurnalistlari Toshkent shahrining 110 va 50- maktablari hududidagi «maktab formasi» kiymagan o‘quvchi va o‘qituvchilarni ularning va ota-onalarning iznisiz TV orqali ochiq ko‘rsatib sazoyi qilishdi.

Xalq ta'limi vaziri Sherzod Shermatov muhim muammolarni unutib, tinimsiz o‘quvchilar formasi haqida yozayotgan, kasb etikasini unutgan jurnalistlarni o‘z «Facebook» sahifasida qoralab chiqdi.

«Etikaga ko‘ra, agar televidenie orqali shaxs roziligisiz biror kishi salbiy obrazda namoyish etilsa, ularni kimdir tanib qolmasligi uchun yuzlarini yopish kerak bo‘ladi. Taraqqiylashgan jamiyatda shaxsni ommaviy tahqirlashga yo‘l qo‘yib bo‘lmaydi, ayniqsa, bolalarni», deya yozdi Sherzod Shermatov.

O‘z hamkasblarining harakatini «Turon-24» nashri jurnalistlari ham qoralashdi. Maqolaga ko‘ra, ko‘rsatuvda «kalta yubka kiygan, soch o‘stirgan, yuzlarini bo‘yagan o‘quvchilar bilan birga ustoz-murabbiylar»ning kiyinishlari qoralangan.

«Lekin birortasining yuzlari yopilmagan yoki tanimas darajada berkitilmagan. TV jurnalistlari shu tariqa o‘z kasbini suiiste'mol qilgan holda inson huquqlarini poymol qilgan».

Shunga o‘xshash holat joriy yilning 1 aprelida efirga uzatilgan, yoshlarning istirohat bog‘larida qo‘l ushlashib yurgani, o‘pishgani qoralangan «Yashirin kamera» ko‘rsatuvi jamoatchilik noroziligiga sabab bo‘lgan edi.

Ko‘rsatuvda uning boshlovchisi 22 yashar Badriddin Husniddinov yoshlar oldiga kamera bilan qo‘qqisdan borib so‘roqqa tutadi.

3 aprel kuni O‘zbekiston Adliya vazirligi bu ko‘rsatuvni uzatgan «Mening yurtim» telekanalini xalqaro va mahalliy qonunchilik me'yorlarini buzganligi haqida rasmiy ogohlantirish bergan edi.

Rassom Tuz
Eltuz.com