O‘zbekistonda paxtaga davlat buyurtmasi bekor bo‘ldi. Quvonsak bo‘ladimi?

2020 yildan O‘zbekiston paxtaga davlat buyurtmasidan voz kechadi. Prezident Mirziyoev farmoniga ko‘ra, 2020 yil hosilidan boshlab viloyatlarning paxta yetishtirish rejasi belgilanmaydi.

O‘zbek matbuoti «tarixiy» deya atayotgan bu qarorga ekspertlar skeptik qarashlarini ham bildirishmoqda.

Xususan, taniqli o‘zbek eksperti Alisher Ilhomov quvonishga hali erta, deya hisoblaydi.

«Gap shundaki, de fakto paxta uchun majburiy davlat buyurtmasi endilikda tumanlarda yaratilayotgan klasterlar darajasiga ko‘chiriladi. Bu mantiqan mahalliy hokimlarga bog‘liq tarzda ishlaydigan, ayni tumanda raqobatchining paydo bo‘lishiga yo‘l qo‘ymaslik va fermerni paxta yetishtirish va uni past narxlarda topshirishda davom etishi uchun burchakka tiqish maqsadida tuzilgan monopolistik tuzilmadir.  

Aksariyat klasterlar ortida ularga ofshor zonalar orqali egalik qilayotgan oligarx doiralar turibdi. O‘z yeridan foydalanishda fermer real erkinlikka egami va nimani ekishni uning o‘zi hal qila oladimi – shu holat progress ko‘rsatkichi bo‘lishi mumkin. Buni faqat tajribada tasdiqlash mumkin, chunki O‘zbekistonga xos sharoitlardan kelib chiqib, rasmiy qabul qilingan qaror ko‘p narsani anglatmaydi. Amalda ishlar qabul qilingan qonunlarga emas, hokimlar o‘rnatadigan tushunchalarga muvofiq asoslarda amalga oshiriladi», deya yozdi Alisher Ilhomov Feysbukdagi sahifasida.  

Eltuz.com