Senat raisi mamlakatdagi o‘g‘irliklar haqida gapirdi

O‘zbekiston Senatining 7 avgust kuni ochilgan oltinchi yalpi majlisida parlament yuqori palatasi raisi Tanzila Norboeva mamlakatda korruptsiya avj olganini ta'kidladi.

«Koronavirusga qarshi kurash tadbirlari uchun ajratilayotgan mablag‘lar, aniqrog‘i, Inqirozga qarshi kurashish jamg‘armasi mablag‘lari talon-taroj qilinayotgani bizni tashvishlantirmoqda. Xususan, Andijon, Buxoro, Qashqadaryo, Navoiy, Namangan viloyatlaridagi sanitariya epidemiologiya xizmati mutasaddilari tomonidan umumiy hisobda bir milliard 750 million so‘mdan ziyod mablag‘i talon-taroj etilganiga jiddiy e'tibor qaratish taqozo etiladi», dedi u.

Palata raisi, shuningdek, oliy ta'lim sohasida korruptsiya deyarli barcha bosqichlarda mavjudligi, bu mamlakat ta'lim tizimi reytingiga jiddiy ta'sir ko‘rsatayotganini ta'kidladi.

«Mana, bugungi kunda buning oqibatida respublikadagi birorta oliy o‘quv yurti dunyo oliy o‘quv yurtlari reytingidagi mingtalikka kira olmagan», dedi Norboeva.

Eltuz.com