Namangan inkassatsiya boshqarmasidagi tanish-bilishchilik

Namangan viloyati inkassatsiya boshqarmasida ishga qabul qilish jarayonlarida qonunbuzarlik va tanish-bilishchilik holatlari mavjudligi aytilmoqda.

Fuqarolarning bildirishicha, boshqarma boshlig‘i X. Asrorov tomonidan asosan o‘z qarindoshlari, yaqin tanishlari hamda Yangiqo‘rg‘on tumani fuqarolari ishga olinmoqda. Bo‘sh ish o‘rinlari rasmiy ravishda e'lon qilinmasdan, yopiq tarzda to‘ldirilayotgani qayd etilgan.

Shuningdek, amaldagi nizomda belgilangan yosh cheklovlari va harbiy xizmat bo‘yicha talablar oddiy fuqarolarga qat'iy qo‘llanilgan holda, rahbariyatga yaqin shaxslarga nisbatan qo‘llanilmayotgani aytilmoqda. 

Ayrim holatlarda intizom buzgan xodimlarga chora ko‘rilmagan, oddiy xodimlar esa qattiq jazolangan.

Mazkur holatlar sababli 150 nafardan ortiq yosh fuqarolarning ishga joylashish huquqi buzilayotgani ta'kidlanmoqda. 

Fuqarolar mas'ul idoralardan ushbu holatlar yuzasidan chuqur va xolis tekshiruv o‘tkazilishini so‘ramoqda.