Mirziëev: Men 10 ming mahkumni ozod qilmoqchi edim (Video)

Konstitutsiyaning 25 yilligiga bag‘ishlab 7 dekabr kuni qilgan chiqishida prezident Mirziyoev 2700 odamni avf qilganini bildirdi.

«Hozir 57 ming odamimiz qamoqlarda yotibdi. Men 10 ming odamni (avf qilishni) reja qiluvdim. Topolmadik», dedi u.

Ekstremizm tamg‘asi ostida qamalgan mahkumlar haqida gapirarkan, «adolatsiz qamoqqa tashlashganlari uchun ular adolatsiz xalqqa ham, adolatsiz jamiyatga ham dushman bo‘lishgan», dedi prezident.

«Kim u? Yomon yo‘lda yuribdi, ekstremist! Ekstremistni kim qilgan? Mahalla qilgan, qo‘shnilar qilgan, jamiyat qilgan, davlat qilgan…»

Avf qilinganlar to‘la oqlanishini ta'kidlarkan, kelgusi yildan qonunga bu yuzadan o‘zgarish kiritish haqida topshiriq berganini bildirdi.

«Bu tariximizda birinchi bor avf qabul qilinishi. Uni amnistiya bilan chalkashtirmaslik kerak», dedi u.

Prezident 17 ming odamdan 16 mingini qora ro‘yxatlardan o‘chirganini aytdi. Shuningdek, u jamiyatning ilmdan, ma'rifatdan, tarixdan uzoqlashgani bois bu kabi illatlar kelib chiqayotganini urg‘uladi:

«Bizda ekstremizm yo‘q deb aytish bilan uning yo‘q bo‘lishi o‘rtasida katta farq bor. Bizda katta fojea bor – o‘qimay qoldik biz!»

Video: https://youtu.be/9zOXS8sonkk

Eltuz.com