Imomning seks haqidagi gapi tanqidga uchradi (video)

Kanadalik o‘zbek huquqshunosi Dilsora Fozilova 8 mart kuni «Eltuz» kanali orqali yunusobodlik imom Rahmatulloh Sayfuddinovning «turk seriallarini ko‘rgan ayollardan geylar tug‘iladi», degan fikriga munosabat bildirdi.

Toshkentning Mirza Yusuf masjidi imomi Rahmatulloh Sayfutdinov 2 mart kuni turk seriallarini qoralab, ulardagi chiroyli erkaklarni ko‘rgan ayollar jinsiy aloqa payti ularni tasavvur qilsa, bunday ayollardan «havorang (gey) bolalar» tug‘iladi”, degan gapni aytgan.

O‘zbek imomining bu fikri, Fozilovaga ko‘ra, bugungi kunda ilmsizlikdan boshqa narsa emas.

«Masalan, bachchabozlik 14-asrda ko‘payib ketgani, shuningdek, musulmon davlatlarida ham qaysidir tarixiy davrlarda kuchaygani to‘g‘risida ma'lumotlar bor. O‘sha paytlarda, masalan, bizda seriallar yo‘q bo‘lgan, televizor, telefon, rasmlar, reklamalar yo‘q bo‘lgan. Lekin bunday holat keng tarqalgan paytlar bo‘lib o‘tgan», deydi huquqshunos.

Ayollar eri bilan jinsiy aloqa payti turk seriallaridagi yigitlarni tasavvur qiladi, degan imomning yana bir iddaosini Fozilova ayollarga qilingan tuhmat, deb biladi.

«Tasavvur qiladi, deb biz ayollarga tuhmat qilyapmiz. Agar tasavvur qilish gunoh bo‘lsa, buning uchun serial tomosha qilish shart emas. Ular ko‘chada, kontsertda, internetda ko‘rgan istagan odamini tasavvur qilishi mumkin, deb o‘ylayman», deydi Fozilova.

Fozilova, shuningdek, «Eltuz» nashriga bergan sharhida agar diniy institutlar, imomlar, mullalar, bugungi kunda turk seriallarni taqiqlashdan ko‘ra, odamlarni foydali ishlarga safarbar qilganida, balki ularni qo‘llagan bo‘lishini bildirdi.

Eltuz.com