DXX kirdikorlari haqidagi iddaolar

DXX rahbari Ixtiyor Abdullaev, sobiq KGB mulozimlari bilan prezident Mirziyoev o‘rtasida tobora avj olgan ko‘rpaosti urushiga oid ushbu videodagi faktlar «Eltuz» nashriga Davlat xavfsizlik xizmatida ishlovchi alohida ikkita manbadan kelib tushdi. 

11 yanvar kuni yetib kelgan ma'lumotlarga va «Eltuz» nashrining o‘z ismlarini ochiqlamaslikni lozim ko‘rgan DXX xodimlari bilan yozishmalariga ko‘ra, o‘tgan oy oxirida prezident Mirziyoev ortidan kuzatuv o‘rnatgan DXX raisining birinchi o‘rinbosari 46 yoshli Jahongir Egamov va xavfsizlik xizmatining bu ishga aloqador yana besh nafar mulozimi hibsga olingan.

Ular orasida DXX Tergov boshqarmasi boshlig‘i Abror Abdullaev va DXX sirtqi nazorat tezkor xodimi Botir Hakimov ham bor.

Xavfsizlik xizmati mulozimlarining qamoqqa olinishiga Mirziyoev ortidan kuzatuv guruhi tashkil etilgani, shuningdek, ularning yirik miqdorda korruptsiyaga va qarindosh-aymoqchilikka yo‘l qo‘yishgani iddao qilinmoqda.

DXX tekshiruv bo‘limi xodimi yetkazgan ma'lumotga ko‘ra, tergov ishini DXXning Ichki xavfsizlik va shaxsiy tarkib faoliyatini nazorat qilish boshqarmasi boshlig‘i Muxtor Mirziyoev olib borayotir.

Ayni iddaolar yuzasidan «Eltuz» hozircha rasmiylar izohini ololgani yo‘q. Biroq bu faktlarning jamoatchilik uchun ochiqlanishi muhimligini e'tiborga olib, «Eltuz» olingan ma'lumotlarni nashr etishga va film tarzida taqdim etishga qaror qildi. Tahririyat muqobil ma'lumotlarni taqdim eta oladiganlar bilan ham gaplashishga tayyor.

Video: https://youtu.be/C3nkHsS1pb8