Rossiyada 74 yoshli ayolni o‘ldirib, jasadini tahqirlagan o‘zbek qo‘lga olindi

Bu voqea 2011 yilda Moskvaning Bittsevo bog‘ida sodir bo‘lgan edi. O‘shanda noma'lum shaxs Chertanovo tumanida yashovchi 74 yoshli ayolga hujum qilib, uni shafqatsizlarcha o‘ldirgan. Jinoyatchi bu bilan to‘xtamay, marhumaning jasadi bilan jinsiy aloqa qilib, uni tahqirlagan.

Mudhish jinoyatni sodir etgandan so‘ng, gumonlanuvchi darhol Rossiyani tark etib, o‘z vatani — O‘zbekistonga qochib ketgan. Uzoq yillar davomida u qilmishi unutilgan va izi yo‘qolgan deb hisoblab kelgan. Biroq, oradan 12 yil o‘tib, yana pul topish maqsadida Rossiya poytaxtiga qaytib kelgan.

Jinoyatchi Moskvada o‘tkazilgan navbatdagi migratsiya reydi vaqtida qo‘lga olindi. Zamonaviy texnologiyalar va kriminalistika rivojlangani sababli, uning shaxsi darrov aniqlangan.

Jinoyat sodir etilgan joydan olingan namunalar qo‘lga olingan shaxsning DNKsi bilan to‘liq mos kelgan.

Hozirda gumonlanuvchi o‘z aybini tan olgan va unga nisbatan tegishli jazo choralari ko‘rilmoqda.

Bu kabi voqealar nafaqat bir shaxsning fojiasi, balki butun millat imijiga tushayotgan qora dog‘dir.

Bugungi kunda yuzlab vatandoshlarimiz xorij qamoqxonalarida aynan seksual zo‘ravonlik va og‘ir jinoyatlar uchun jazo o‘tamoqda. Bu esa har bir muhojir uchun xulosa chiqaradigan achchiq haqiqatdir.