Россия Америка товарларига санкция эълон қилади

Россия Давлат думаси 13 апрель куни АҚШнинг навбатдаги санкцияларига жавоб лойиҳасини тайёрлади. Interfax хабарига кўра, қонун лойиҳасида АҚШ ширкатларини Россиядаги хусусийлаштиришдан четлатиш ҳам кўзланган ва Россия Америка товарларини эгаларининг рухсатисиз ишлаб чиқариши мумкин.

Янги қонун лойиҳасига кўра, АҚШ ва унга ҳамкор давлатларнинг маҳсулот ва хизматларини Россияга импорт қилиш тақиқланади, иқтисодий алоқаларни чеклаш кўзланади.

Янги қонун АҚШда ишлаб чиқарилган дастурлар, дори-дармон, тамаки ҳамда спиртли ичимликлар импортини чеклашни кўзлайди.

Россия, шунингдек, ракета ва самолётсозлик соҳаларида АҚШ билан ҳамкорлик қилишни тўхтатади.

АҚШнинг 6 апрель куни Россия ширкатларига қарши санкциялари оқибатида россиялик элликка яқин бадавлат олигарх 12 миллиард доллар йўқотишган эди.

АҚШ Молия вазирлиги янги санкцияларни Кремлнинг “дунё бўйлаб зарарли фаолиятига” қарши жорий қилганини билдирган.

Eltuz.com