Запорожье АЭС атрофида ўт очишни тўхтатишга келишилди

Reuters агентлигининг МАГАТЭга таяниб хабар беришича, Россия ва Украина Запорожье АЭС ҳудудида электр узатиш тармоқларини таъмирлаш учун маҳаллий ўт очишни тўхтатиш бўйича келишувга эришдилар.

Ушбу келишувдан мақсад Станцияни ташқи электр таъминоти билан таъминловчи шикастланган тармоқларни, хусусан, «Ферросплавная-1» (330 кВ) линиясини тиклаш экани билдирилган.

Келишув Атом энергияси бўйича халқаро агентлик (МАГАТЭ) раҳбари Рафаэль Гроссининг бевосита воситачилигида амалга оширилди.

МАГАТЭ вакиллари станциядаги хавфсизликни таъминлаш ва юзага келиши мумкин бўлган ядровий фалокатларнинг олдини олиш мақсадида тиклаш ишларини бевосита кузатиб бормоқдалар.

Станциянинг олтита реактори айни дамда тўхтатилган бўлса-да, реакторларни совутиш тизимларининг узлуксиз ишлаши учун ташқи электр қуввати ўта муҳим ҳисобланади.

МАГАТЭ раҳбари иккала томоннинг ушбу мураккаб таъмирлаш режасини амалга ошириш учун конструктив ҳамкорлик қилганини алоҳида таъкидлади.