Бир ярим йилда 37 марта жаримага тортилган ИИБ бошлиғи…

Жиззах вилояти ИИБ бошлиғи ўринбосари — жамоат хавфсизлиги хизмати бошлиғи Бўриев Раҳматулло Холбекович 2024 йил ноябрь ойидан 2026 йил январига қадар унга бириктирилган хизмат машинаси – BYD Song-Plus DM-i-да 37 маротиба йўл-транспорт қойидасини бузган. 

Элтуз қўлга киритган расмий ҳужжатларга кўра, Жиззах вилояти бўйича жамоат хавфсизлигига масъул бўлган асосий шахс ўтган салкам бир ярим йил ичида жаъми 28 миллион 533 минг 400 сўм жаримага тортилган эса-да, давлатга бир тийин ҳам тўламаган.

Маълумотлар махсус базасидаги радар тасвирларидан кўринадики, Раҳматулло Бўриев кўп ҳолларда ҳаракат тезлигини оширган, йўл чизиқларини босиб ўтган, чорраҳаларда қизил чироқ ёниб турган бўлса ҳам катта тезликда машинасини ҳайдаб ўтган.

Бундан ташқари, Раҳматулло Бўриев ўз амалидан фойдаланиб ЙҲХБга тегишли 25 547 VSF рақамли патруль автомашинасини ҳам мигалкалари ва ЙПХ ёзувларини олиб ўз эҳтиёжи учун фойдаланмоқда.

Элтуз суҳбатлашган ЙҲХБ ходимлари Раҳматулло Бўриевнинг баъзида машинани маст ҳолда ҳайдашини айтадилар. 

Умуман юқори мартабали ички ишлар ходимларининг қонунни бузиши кенг тарқалган. 

Ўтган йил июл ойида Фарғона вилояти ЙҲХБ бошлиғи, подполковник Акмал Аҳмедов турмуш ўртоғига тегишли Malibu автомобили билан боғлиқ 100 дан ортиқ йўл ҳаракати қоидаларини бузиш ҳолатларини бекор қилгани учун вазифасидан бўшатилганди.