«Миннатдор» қариялар ва президент феълига мослашаётган сўров маркази

«Оила ва жамият» газетаси (12.04) президентнинг пенсионерларга метрода юришни (10.00 дан 16.00 гача) текин қилиб қўйганидан «миннатдор» кексаларнинг «катта мамнуният»га тўла дил изҳорларини эълон қилди.

Мана шундай «эътибор ва эъзоз»дан хурсанд кексалар «дунёнинг ҳеч бир мамлакатида йўқ бундай имконият» учун президент ҳақига дуолар қилибди.

Марҳум президент Каримов агар шундай имтиёз берганда-ку, бу дуогўй қариялар борига барака деб қаноатланган бўларди.

Аммо янги президентнинг «халқ билан мулоқот инсон манфаатларига катта эътиборидан» сал эркинсираб кетган шекилли, текин юриш вақтини қайта кўриб чиқиш таклифини ўртага ташлагани сал «ношукрчилик»дек туюлади.

Шунингдек, газетада «Ижтимоий фикр» марказининг давлат бошқаруви ва маҳаллий ҳокимият органлари фаолиятининг самарадорлиги ва ошкоралиги бўйича ўтказган сўрови хулосалари эълон қилинди.

Иштирокчилар ҳокимият ижроия органлари раҳбарлари фаолиятининг очиқлигини турлича баҳолабди.

«40,7 фоиз респондент барча маълумотларни очиқ ва етарли, деб баҳолаган. 33,9 фоизи ҳамма фуқаролар учун ҳам маълумотлар ошкора эмас, деб ҳисоблайди», дейилади марказ хулосасида.

Келтирилган рақамларда аввалгидек қарийб юз фоизлик ижобий хулосалар йўқлиги эътиборни тортади.

Бу хулосалар мазкур марказ ҳам янги президентнинг «феълига» мослашишга интилаётганидан дарак бериб турибди.

Баҳодир Шариф
Ўзбекистонлик газетхон таҳаллуси
Eltuz.com