Мижозлар телефон рақами эгаларига қарам бўлишадими?

Ўзбекистон матбуоти, илк бор мижозларнинг мобил операторларга қарамлиги масаласини кўтарди.

Ўзбекистонда мобил алоқанинг қимматлиги, операторлар хизмати сифати пастлигидан шикоят қилмаган одам йўқ, бироқ бу ҳақда газеталарда ёзилмасди.

Ҳусусан «Хабар» газетасида (07.04) эълон қилинган «Рақамни алмаштириш мумкинми ёхуд «мобил қарамлик»дан қутулиш ҳақида» сарлавҳали мақолада «бир оператор хизматларидан фойдаланиб келаётган мижоз учун ўз операторини бошқасига алмаштириш маълум қийинчиликларни юзага келтираётгани» таъкидланади.

«Республикамизда мобил алоқа операторлари ўртасида мобил телефон рақамлари префиксларининг ўзаро бўлинганлиги сабаб мижоз ўзи ўрганган, ўзининг иш фаолияти ёки бошқа сабабларга кўра қулай бўлган телефон рақамини бошқасига алмаштириши зарурлиги катта ноқулайлик туғдиради», дейилади мақолада.

Тўғри, матбуотда ёритилишидан аввал «мобил қарамлик» муаммоси расмий идора – Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси вакили томонидан кўтарилгани айтилади.

Муаллиф мобил қарамликдан қутулишнинг бир йўли «телефон рақамини сақлаган ҳолда мобил алоқа операторини алмаштириш имконияти яратилиши» эканини билдиради.

Унинг ёзишича, бундай имкониятнинг яратилиши мобил алоқа операторларини ўз хизмати сифатини яхшилашга ундайди, бундан эса фақат мижозлар манфаатдор.

Баҳодир Шариф
Ўзбекистонлик газетхон таҳаллуси
Eltuz.com