Деновда элэктр инфратизилмаси янгиланмоқда, аммо ногирон фуқаролар уйлари четда қолди

Сурхондарё вилояти, Денов тумани, Катта Қарши маҳалласи аҳолиси электр инфратузилмаси янгиланишида адолатсизликка дуч келаётганини маълум қилмоқда.

2025 йилда давлат бюджети маблағлари ҳисобидан маҳаллада янги бетон устунлар ва замонавий кабеллар ўрнатиш ишлари бошланди. Бу аҳоли турмуш шароитини яхшилаш учун муҳим қадам сифатида баҳоланмоқда.

Бироқ маҳалланинг айрим кўчалари, жумладан 4–5 та хонадон, ногиронлиги бор фуқаролар истиқомат қиладиган уйлар мазкур ишлардан четда қолдирилди. Сабаби — уй эгалари туман электр тармоқлари корхонасига қўшимча пул тўлай олмаган.

Энг ачинарлиси, ушбу хонадонларда салкам ярим аср олдин ўрнатилган ёғоч устунлар ҳалигача алмаштирилмаган. Улар чириб, электр симлари билан бирга инсон ҳаёти учун хавфли ҳолатга келган. Бу аҳвол болалар, кексалар ва ногирон фуқаролар ҳаёти учун тўғридан-тўғри таҳдид солмоқда.

Қолаверса, Катта Қарши маҳалласи “қизил ҳудуд” сифатида белгиланган. Бу эса масаланинг янада жиддий ва долзарб эканини кўрсатади.